Faqja e re e tatimeve u publikua gjatë vjeshtës së 2026.

Ajo ndryshon strukturën, lundrimin dhe disa përmbajtje të tatime.gov.al, sajti zyrtar i Drejtorisë së Përgjithshme të Tatimeve. Për bizneset dhe kontabilistët që e përdorin shpesh si burim, disa nga këto ndryshime meritojnë vëmendje konkrete.

Portalet ku kryeni veprimet e përditshme nuk kanë ndryshuar vendndodhje. Deklaratat dorëzohen ende te e-Filing. Hyrja me llogari, certifikatat dhe vërtetimet bëhen ende te e-Albania. Ajo që ndryshon është si gjeni informacionin rreth tyre te faqja e DPT-së. Më poshtë gjeni pikat që ju ndihmojnë më shumë.

Lundrimi i ri, sipas llojit të tatimpaguesit

Deri tani, tatime.gov.al ishte ndarë kryesisht sipas temës, Legjislacioni, Fiskalizimi, Tatimi mbi Vlerën e Shtuar e kështu me radhë. Kjo strukturë mbetet, por faqja e gjen tani informacionin më shpejt kur e njeh llojin tuaj si tatimpagues.

Mbi këtë, faqja ka shtuar një shtresë të dytë lundrimi, sipas llojit të tatimpaguesit. Individ mbulon personin pa aktivitet biznesi, me zbritjet nga paga, kompensimin për fëmijët dhe deklarimin vjetor. Person Fizik mbulon tregtarin e vetëm dhe të vetëpunësuarin me NIPT. Entitete mbulon shoqëritë tregtare, entet publike dhe OJF-të. Kjo e bën më të lehtë gjetjen e informacionit kur e dini çfarë jeni, jo vetëm temën që kërkoni.

Konkretisht, ja ku shkoni direkt sipas asaj çfarë jeni.

1. Individ, pa biznes -->> tatime.gov.al/individ/ -->> Vërtetim pagese ose certifikatë rezidence, te e-Albania

2. Person fizik, me NIPT -->> tatime.gov.al/person-fizik/ -->> Dorëzimi i deklaratës, te e-Filing

3. Shoqëri, OJF ose ent publik -->> tatime.gov.al/entitete/ -->> Regjistrimi i subjektit tatimpagues, te e-Albania

Faqja ka shtuar edhe një asistent bisede, të quajtur Muçi. Është i ngjashëm me asistentët e tjerë të shërbimeve publike dixhitale të vendit.

E provuam vetë me disa pyetje konkrete. Për afatin e TVSH-së tregoi saktë ditën kur data bie të shtunën. E zhvendosi vetë në ditën e parë të punës pas saj.

Për gjobat e deklarimit me vonesë dha shifrat e sakta, 10,000, 5,000 dhe 3,000 lekë sipas llojit të tatimpaguesit. E pyetëm edhe me një shifër të vjetruar, pragun e TVSH-së prej 2,000,000 lekë. E korrigjoi vetë dhe dha shifrën aktuale, 10,000,000 lekë.

Pa specifikuar rastin, e testuam edhe me normën e TVSH-së sipas nenit 48. U përgjigj saktë me shkallën standarde prej 20%, por pa kërkuar më parë sqarim se për çfarë shërbimi bëhej fjalë. Kjo tregon kujdesin që duhet pasur, një përgjigje e saktë në dukje mund të mos i përshtatet rastit tuaj specifik.

Për akomodimin në një bujtinë apo hotel, dha normën e reduktuar 6% për fjetjen me mëngjes, saktësisht siç parashikon ligji. Shtoi edhe dy raste më të veçanta. Brenda një hoteli me pesë yje të njohur ndërkombëtarisht, 6% zbatohet për çdo shërbim. E njëjta normë vlen edhe për restorantin e një agroturizmi të certifikuar, me përjashtim të pijeve.

Ai përgjigjet për pyetje tatimore, por për ta përdorur duhet të identifikoheni më parë me llogarinë tuaj në e-Albania. Për pyetje të shpejta e të përgjithshme mund të ndihmojë, por për çështje specifike të biznesit tuaj, konsultimi me kontabilistin mbetet rruga më e sigurt.

1. Lundrimi kryesor -->> Vetëm sipas temës -->> Edhe sipas llojit të tatimpaguesit, Individ, Person Fizik, Entitete

2. Marrëveshjet ndërkombëtare -->> Fjali e përgjithshme, pa listë -->> Tabelë e plotë, 45 shtete, me lidhje shkarkimi

3. Përkufizimi i personit fizik -->> Nuk jepej drejtpërdrejt -->> Përkufizim i qartë, me tri kushte

4. Lajmet e DPT-së -->> Faqe e thjeshtë njoftimesh -->> Kategori e veçantë, /te-rejat-e-fundit/

Tabela e plotë e 45 marrëveshjeve për shmangien e taksimit të dyfishtë

Nëse ju duhet teksti i një marrëveshjeje për shmangien e taksimit të dyfishtë, ose certifikata e rezidencës tatimore të një vendi partner, e gjeni tani drejtpërdrejt te seksioni Legjislacioni, Marrëveshje ndërkombëtare. Deri vonë, faqja e DPT-së ju dërgonte vetëm te Udhëzimi nr. 11/2024, pa listën e vendeve. Tani boton një tabelë të plotë me 45 shtete, me numrin e ligjit ratifikues, datën e hyrjes në fuqi dhe lidhjen për shkarkimin e tekstit origjinal për secilin.

Një gjë për ta pasur parasysh, nëse kontrolloni rreshtin e Luksemburgut. Data e hyrjes në fuqi e dhënë nga DPT duket e pasaktë për një marrëveshje të ratifikuar në 2009. E kemi mbajtur të dhënën siç e jep burimi zyrtar edhe te faqja jonë e marrëveshjeve, por e kemi shënuar qartë, që ta verifikoni rast pas rasti para se ta përdorni.

Përkufizimi zyrtar i “personit fizik”

Seksioni i ri Person Fizik jep tani një përkufizim me tri kushte. Është i dobishëm veçanërisht për lexuesit që hasin këtë term pa e njohur paraprakisht dallimin nga sh.p.k. Person fizik, për qëllime tatimore, është individi që ushtron veprimtari ekonomike të pavarur, biznes apo profesion i lirë. Nuk është subjekt juridik. Është i regjistruar njëkohësisht në QKB dhe në organet tatimore, me NIPT aktiv.

E kemi shtuar këtë përkufizim edhe te faqja jonë. E kemi vendosur menjëherë pas shpjegimit që jep Kodi Civil, që lexuesi t’i ketë të dyja krahas njëra-tjetrës.

Çfarë duhet të kontrolloni nëse keni lidhje të ruajtura

Shumica e lidhjeve të thella me skemën e vjetër, /c/ dhe /d/, vazhdojnë të funksionojnë normalisht. Gjatë kontrollit tonë gjetëm vetëm një përjashtim. Një njoftim i DPT-së nga viti 2024, për përditësimin e llogarive bankare, nuk funksiononte më. E përdornim te një artikull ynë, për rimbursimin e këstit të tatim fitimit.

Nëse mbani vetë lidhje të ruajtura drejt faqeve të thella të DPT-së, ia vlen t’i rikontrolloni. Kjo vlen veçanërisht për lidhjet drejt njoftimeve apo udhëzimeve të vjetra.

Lajmet e DPT-së kanë kategori të veçantë tani

Njoftimet aktuale gjenden tani te Të rejat e fundit. Nga njoftimet e muajve të fundit, dy kanë vlerë praktike. I pari zgjidhi problemin teknik të fiskalizimit të 18 gushtit, që prekte faturat pa kod unik NIVF. I dyti është VKM-ja nr. 113, datë 27.2.2026. Ajo ndryshon raportimin CRS të institucioneve financiare, me afat të parë dorëzimi 30 maj 2027.

Pyetjet më të shpeshta

A duhet të ndryshoj diçka unë si klient i AlProfit?

Jo. Ne i kemi përditësuar vetë lidhjet dhe burimet tona sipas faqes së re të DPT-së. Nuk kërkohet asnjë veprim nga ana juaj.

Pse faqja jonë tregon tani 45 marrëveshje dhe jo “mbi 40”?

Sepse DPT boton tani vetë listën e plotë e të numëruar, diçka që më parë nuk e bënte drejtpërdrejt. E kemi përditësuar faqen tonë me të njëjtën shifër dhe me tabelën e plotë.

A vazhdojnë të funksionojnë lidhjet e vjetra të tatime.gov.al?

Po, shumica funksionon normalisht. Vetëm një lidhje e thellë, drejt një njoftimi të vitit 2024, doli e prishur gjatë kontrollit tonë. E hoqëm nga artikulli ku përdorej.

Çfarë konsiderohet “person fizik” sipas DPT-së?

Individi që ushtron veprimtari ekonomike në mënyrë të pavarur. Nuk është subjekt juridik dhe është i regjistruar në QKB dhe në organet tatimore, me NIPT aktiv.

A ndryshuan normat apo afatet tatimore me këtë rinovim të faqes?

Jo. Rinovimi prek vetëm strukturën, lundrimin dhe disa përmbajtje shpjeguese të faqes. Normat, afatet dhe detyrimet tatimore nuk kanë ndryshuar si pasojë e tij.

Ku gjej lajmet e fundit të Tatimeve tani?

Te kategoria e re “Të rejat e fundit”, e përmendur edhe më sipër, që mban të gjitha njoftimet aktuale të Drejtorisë së Përgjithshme të Tatimeve.

Përditësim, 30 tetor 2026

Shifra 10,000,000 lekë, e dhënë si aktuale në këtë provë, vlen deri më 31 dhjetor 2026. Me VKM nr. 822, datë 28.10.2026, botuar në Fletoren Zyrtare nr. 233, kufiri minimal i regjistrimit në TVSH ulet në 5,000,000 lekë nga 1 janari 2027, nga 10,000,000 lekë sot. Si matet qarkullimi dhe çfarë afati keni.

Burimi: Alprofit Consult